ሠላም ጤና ይስጥልኝ ክቡራን አንባቢያን ፤ ከዚህ መካነ-ድር (ድረ ገፅ) ላይ የምትወስዱትን ማንኛውንም ፅሑፍም ይሁን ምስሎች ለአዘጋጆቹ እና ለፀሐፊዎቹ ክብር ሲባል በምትጠቀሙበት ቦታ ሁሉ ምንጩን ትጠቅሱልን ዘንድ በትህትና እናሳስባለን ፡፡

Wednesday, January 11, 2017

ከመጥፋቴ ስመለስ

ሰላም ጤና ይስጥልኝ የተከበራችሁና የተወደዳችሁ ወዳጆቼ ፤

      እረጅም ጊዜ ሊባል በሚያስችል ሁኔታ ጥፍት ብዬ እረስታችሁኝ እንደነበር የነበረ አሰብኩ፡፡ ይህም የሆነው  ከዚህ ቀደም እንገለፅኩት በተለያዩ ምክንያቶች ሲሆን በስራ መደራረብ ፣ በትምህርት ፣ በፊልም ስራ ፣ ወዘተ. .. እንደቀድሞው ቶሎ ቶሎ መገናኘት አልቻልንም፡፡ በዋነኛነት ግን ለረጅም ጊዜ ለመጥፋቴ ምክንያት የሆኑኝን ጉዳዮች ዛሬ ልተንፍስ እና ቀሪውን ደግም ሌላ ጊዜ በሰፊው ማውራት እንችላለን፡፡

 ለዓመታት ሳልማቸው ከነበሩት ትልልቅ ህልም እና ዕቅዶቼ መካከል የ"ፊልም እና ፎቶግራፍ ፕሮዳሽን " ማቋቋም እና የጉዞ ማህበር መመስረት ነበሩ፡፡ በስተመጨረሻም ሁለትና ከዛ በላይ ዓመታት በላይ ፈጅተውብኝ፤  አሁን ግን ሙሉ ለሙሉ ሊባል በሚችል ሁኔታ ከግብ ለማድረስ ተችሏል፡፡

 የመጀመሪያው "እይታ ፊልም እና ፎቶግራፍ ፕሮዳክሽን " ሲሆን ሁለተኛው ደግሞ " እይታ የመንፈሳዊ ጉዞ ማህበር " ናቸው፡፡  ሁለቱንም ለማቋቋምና ስራ ለመጀመር ሳስብ የራሴ አሻራ እንዲኖራቸው ከማሰብ ጀምሮ አብረውኝ እስከሚሰሩት ድረስ በተሻለ ጥንቃቄ  ስመርጥ የቆየሁ ሲሆን ቀላል የማይባል ድካም ነበረው ፡፡ ከዛም በላይ ከእናንተ ወዳጆቼ አራርቆኝ ነበር፡፡

          ወደቀደመው መነሻ ስመለስ በብዙ ፈተና ውስጥ ያለፍኩበትና ከአብዛኛዎቻችሁ ጋር ያስተዋወቀኝ  " የብስራት እይታ " (www.bisrat-views.blogspot.com) ድረገፅ እንደከዚህ ቀደም ሳይሆን መቀዛቀዝ ይታይበታል፡፡ ይኽም የሆነው ከላይ በገለፅኳቸው ምክንያት ሲሆን በተቻለኝ አቅምም ባለኝ ኃይል ወደቀደመው ተፅዕኖ ፈጣሪነቱና ተነባቢነቱ ለመመለስ እጥራለሁ፡፡ እዚህ ላይ የእናንተም ድጋፍና እርዳታ በጣሙን ያስፈልገኛል፡፡

በቀደሙት ጊዜያት በጣም የበዙ ፅሑፎች አዘጋጅቼ  ሳይወጡ የቀሩ ሲሆን ፤ አንዳንዶቹ በወቅቱ መነበብ የነበረባቸው ናቸው፡፡ ቀሪዎቹን ግን ቀስ እያልኩ አቀርብላችኋለሁ፡፡ አሁንስ እጅህ ከምን ለምትሉኝ እንደመታረቂያ የሚሆኑ በቅርብ ጊዜያቶች ውስጥ የተለያዩ ፅሑፎችን ለእናንተ ወዳጆቼ በእይታ መንፈስ ሃሳቤን በ"ብስራት እይታ " ድረገፅ ላይ  አካፍላችኋለሁ፡፡ አርዕስቶቹን ለመዘርዘር ያህል

* እኔና የሶስት ወሯ ሚስቴ (በተከታታይ  ለረጅም ጊዜ)

* የመንፈሳዊ ጉዞዎች መብዛት ጣጣ

* ደፋሮቹ አርቲስቶቻችን እና ቤተክርስቲያን

* ሐዊረ ሕይወት ጉዞ  እንደ ታላቁ የኢትዮጵያ ሩጫ . . .መዝናኛ?

Friday, January 6, 2017

የገና በዓል አከባበር በላሊበላ

     በዚህ በዓል በርካታ የሀገር ውስጥና የውጭ ሀገር ምዕመናን መንፈሳዊ በዓሉን ለማክበርና በረከት ለመሳተፍ የሚጓዙ ሲሆን ሌሎቹም አብያተ ክርስቲያናቱንና መንፈሳዊ የበዓል ሥርዐቱን ለመጎብኘት ነው። ይህም በዓል ሃይማኖታዊ፣ መንፈሳዊ፣ ትውፊታዊ፣ ባህላዊ፣ ኢኮኖሚያዊና ሀገራዊ ፋይዳ አለው።ይህንንም ለማስረገጥ በየዓመቱ ያለማቋረጥ ምዕመናን ከተለያዩ የዓለማችን ክፍሎች መምጣታቸው ነው።
የጌታችን የመድኃኒታችን የኢየሱስ ክርስቶስ የልደት በዓል በመላው  ዓለም የሚከበር ሲሆን በሁሉም የኢትዮጵያ አብያተ ክርስቲያናት፣ ሌሊቱ ማሕሌት ተቁሞ ቅዳሴ እንዳበቃ፣ የበዓል ፍጻሜ ይሆናል፡፡  በላሊበላ ግን በተጨማሪ በዕለቱ ጧት ላይ "ቤዛ ኵሉ" የተሰኘው ክብረ በዓል ከአለት ከተፈለፈሉት የላሊበላ ውቅር አብያተ ክርስቲያናት በአንዱ በቤተ ማርያም ካህናቱ ጋራና መሬት ላይ ሆነው ያከብሩታል፡፡  በተጨማሪ ዕለቱ እራሱ ቅዱስ ላልይበላ(ላሊበላ) ም የተወለደበት
በ ታህሣሥ 29 ቀን የጌታችን የመድኃኒታችን የኢየሱስ ክርስቶስ የልደት በዓልና የገናናው ንጉሥ የቅዱስ ላልይበላ የልደት በዓል በመሆኑም ጭምር በአንድነት በድምቀትና በደስታ ማራኪ በሆነ መንገድ ይከበራል፡፡

የላሊበላው "ቤዛ ኵሉ" አከባበር ትእምርታዊ ነው፡፡ ማሜ ጋራ /ቤዛ ኩሉ ዓለም ሥነ ሥርዓት የሚካሄድበት ቦታ/ ላይ ያሉት የመላእክት ምሳሌ፣ መሬት ላይ ያሉት ደግሞ የእረኞች ምሳሌ ሆነው ዝማሬውን በሆታና በዕልልታ ያጅቡታል፡፡ የክርስቶስ ኢየሱስን መወለድ መጀመሪያ ያወቁ እረኞች በመሆናቸው በአገር ቤት ትውፊቱ እየተነገራቸው የሚያድጉት እረኞች በተለየ ሁኔታ ያከብሩታል፡፡
በዓሉ በቦታው አገልጋይ በሆኑ 670 ካህናትና በአካባቢው በሚገኙ አብያተ ክርስቲያናት በሚያገለግሉ ከ500 በላይ በሚሆኑ ካህናት ታጅቦ ማህሌቱ ይካሄዳል፤ በዚህ በዓል መላው ነዋሪ ‘ካህን’ የመስሎ ሚታይበት አከባበር ነው፤ የማህሌት ሥነ ሥርዐቱ 2፡30 (ማታ) የሰሜን ወሎ ሀገረ ስብከት ሊቀ ጳጳስ መሪነትና ሌሎች ብጹአን አባቶች በሚገኙበት በየዓመቱ ይከበራል።

Saturday, December 31, 2016

ታኅሣሥ 22 ፦ ብስራተ ገብርኤል

       ታኅሣሥ 22 ብርሃናዊው መልአክ ቅዱስ ገብርኤል እመቤታችን አምላክን እንደምትወልድ ያበሰረበት መታሰቢያ በዓል፡፡
ልመናዋ ክብሯ በእኛ ለዘላለም በእውነት ይደርብንና አምላክን የወለደች በድንጋሌ ሥጋ በድንጋሌ ነፍስ የጸናች ክብርት እመቤታችን ያደረገችው ተአምር ይህ ነው፡- ‹‹ልዑል እግዚአብሔር ሊቀ መላእክት ቅዱስ ገብርኤልን ‹ሂድና ለጽዮን ልጅ ለድንግል የእግዚአብሔር የባሕርይ ልጅ ወደአንቺ መጥቶ ኃይለ ልዑል ወልድ ሥጋሽን ለብሶ ሰው ይሆናል፤ ይኸውም ካንቺ የሚወለደው ጽኑዕ ነው ብለህ ንገራት› አለው፡፡

‹ደንቆሮዎች የሚሰሙበት፣ ድዳዎቸ የሚናገሩበት፣ ዕውራንም የሚያዩበት፣ ሙታን የሚነሡበት፣ ለምጻሞች የሚነጹበት፣ ሐንካሳዎች የሚሄዱበት፣ በጨለማ ውስጥ የነበሩ ሰዎች ብርሃን የሚያዩበት ጊዜ እነሆ ደረሰ ብለህ ንገራት› አለው፡፡
ቅዱስ ገብርኤልም ይህን ሰምቶ በግንባሩ ተደፍቶ ልዑል እግዚአብሔርን
‹ጌታ ሆይ! የምትነግረኝ ይደረግ ዘንድ እንደምን ይሆናል?› አለው፡፡ ጌታም ‹የጀመርኩትን ቸርነት ፈጸምኩ፣ የወይን ግንድ ይቆረጣል (ወልደ እግዚአብሔር ይሞታል)፣ ወይራም ከበለስ ጋር ይተከላል (መስቀል ይተከላል)፣ ቅጽሮችም ይቀጸራሉ (ምግባር ከሃይማኖት ጋር ይሠራል)፣ የኤልፍና የሌሚ ወገን ይነሣል፡፡ ገብርኤል ሆይ! ሄደህ ለዳዊት ልጅ ‹እግዚአብሔር ከአንቺ ጋር ነውና ደስ ይበልሽ› ብለህ አብሥራት› አለው፡፡ ‹ለዘለዓለም ነግሦ የሚኖረውን እነሆ ትፀንሳለሽ በላት› አለው፡፡
መልአኩ ቅዱስ ገብርኤልም ይህን ሰምቶ ሰገደ፡፡  ልብሱንም በላዩ ይዞ በመስቀል ቀኝ ይወርድ ዘንድ ወደደ፡፡
 ጌታም ‹መግባትህና መውጣትህ በፍቅር አንድነት ይሁን› አለው፡፡ ‹ዘካርያስን ረግመህ አንደበቱን እንዳሰርህ እርሷን እንዳታሳዝናት ይልቁንም አብዝተህ ደስ አሰኛት አንጂ አለው፡፡ ቅዱስ ገብርኤልም ይህን ሰምቶ ፈጽሞ ደስ እያለው ሊባኖስ ከሚባል ተራራ እስኪሰማ ድረስ ክንፉን እያማታ ወረደ፡፡ በዚህም ጊዜ በዙሪያው ያሉ ሁሉ ‹ይህ የምንሰማው ምንድነው?› ይሉ ነበር፡፡ የተደረገበትንም ቦታ አላወቁትም ነበር፡፡››

Wednesday, February 24, 2016

የካቲት 16 " ኪዳነ ምህረት

     ኪዳነምህረት ስንል የምህረት ቃልኪዳን ማለት ነው፡፡በዚህ ውስጥም ምህረት አድራጊው ጌታችን መድኃኒታችን ኢየሱስ ክርስቶስ ሲሆን ምህረት ተቀባይም መላው የአዳም ዘር ነው፡፡

እናታችን ቅድስት ድንግል ማርያም በምድራዊ ቆይታዋ ዘውትር ወደ ክርስቶስ መካነ መቃብር ጎለጎታ እየወረደች ትፀልይ ነበር፡፡ ልጇ እና ወዳጇ ጌታችን መድሐኒታችን ኢየሱስ ክርስቶስ ያደረገችው ልመናና ፀሎት ተመልክቶና ሰምቶ የምህረት ቃል ኪዳን ገባለት ፡፡

እንኳን የእናቱን ፀሎት እና ልመና ቀርቶ ዘውትር በሀጥያት የምንዘፈቀውን እኛን ክፉዎቹን የሚሰማ አምላክ ስለ አንቺ ፣ ስለ እናቴ ክብርና ፀጋ ስል ይኸው ቃሌ ብሎ ቃልኪዳን አደረገ፡፡
« ከመረጥሁት ጋር ቃል ኪዳኔን አደረግሁ። … » መዝ, 89 : 3 እንዲል መፅሐፉ፡፡

ስሟን ለሚጠሩ፣ በእርሷ አማላጅነት ለሚታመኑ በምድር በረከትን በሰማይ የዘለዓለም መንግስትን እንደሚወርሱ የምህረት እና የቸርነት ቃልኪዳን ሰጥቷታል ፡፡

ታላቁ መፅሐፍ እንዲህ ይላል፦
". . . ቀስቲቱም በደመና ትሆናለች፤ በእኔና በምድር ላይ በሚኖር ሥጋ ባለው በሕያው ነፍስ ሁሉ መካከል ያለውን የዘላለም ቃል ኪዳን ለማሰብ አያታለሁ። " ኦሪት ዘፍ. 9 : 16

በዚህም መሠረት ቃልኪዳኗን ምክንያት በማድረግ ኪዳነ-ምህረት እያልን እንጠራታለን!

እንኳን ለ«ኪዳነምህረት» አደረሳችሁ። የእመቤታችን ምህረት እና ረድዔት፤በረከት ከሁላችን ጋር ይሁን!

Monday, February 22, 2016

እንኳን ለፆመ ነነዌ አደረሳችሁ

        እንኳን ለፆመ ነነዌ አደረሳችሁ። የነነዌን ህዝብ ለቅሶና እንባ ተመልክቶ ፊቱን ከቁጣ የመለሰ አምላክ የእኛንም ሀጢያትና ክፋት ከምንም ሳይቆጥር ፀሎት እና ልመናችንን ሰምቶ ይቅር ይለን ዘንድ እመኛለሁ።
መልካም የፆም ቀናት ይሁንላችሁ!

* * * * *

ዮናስም ተነሥቶ እንደ እግዚአብሔር ቃል ወደ ነነዌ ሄደ፤ ነነዌም የሦስት ቀን መንገድ ያህል እጅግ ታላቅ ከተማ ነበረች። ዮናስም የአንድ ቀን መንገድ ያህል ወደ ከተማይቱ ውስጥ ሊገባ ጀመረ፤ ጮኾም። በሦስት ቀን ውስጥ ነነዌ ትገለበጣለች አለ። የነነዌም ሰዎች እግዚአብሔርን አመኑ፤ ለጾም አዋጅ ነገሩ፥ ከታላቁም ጀምሮ እስከ ታናሹ ድረስ ማቅ ለበሱ። ወሬውም ወደ ነነዌ ንጉሥ ደረሰ፤ እርሱም ከዙፋኑ ተነሥቶ መጐናጸፊያውን አወለቀ ማቅም ለበሰ፥ በአመድም ላይ ተቀመጠ። አዋጅም አስነገረ፥ በነነዌም ውስጥ የንጉሡንና የመኳንንቱን ትእዛዝ አሳወጀ፥ እንዲህም አለ። ሰዎችና እንስሶች ላሞችና በጎች አንዳችን አይቅመሱ፤ አይሰማሩም ውኃንም አይጠጡ፤